ភ្នំពេញ៖នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានពាក់ព័ន្ធដោយប្រយោលជាមួយអ្នកកើតជំងឺ កូវីត-១៩។ ក្រុមគ្រូពេទ្យបានតម្រូវឱ្យសម្តេចនាយករដ្ឋមន្ត្រីធ្វើតេស្តនិងធ្វើចត្តាឡីស័ករយៈពេល១៤ថ្ងៃចាប់ពីល្ងាចថ្ងៃទី១៩ ខែមិថុនា ឆ្នាំ២០២១ នេះរហូតដល់ថ្ងៃទី០៣ ខែកក្កដា ឆ្នាំ២០២១។

នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានសុំអភ័យទោសចំពោះការលុបចោលកម្មវិធីជួបជុំទាំងអស់ដែលបានគ្រោងទុកទាំងការជួបផ្ទាល់ និងជួបតាមវីដេអូ ជាពិសេសត្រូវជួបជាមួយរដ្ឋមន្ត្រីការបរទេសអង់គ្លេសដែលគ្រោងជួបគ្នានៅម៉ោង៩:០០ព្រឹក ថ្ងៃទី២៣ ខែមិថុនា ឆ្នាំ២០២១ ខាងមុខនេះនៅវិមានសន្តិភាព។

សម្តេចតេជោ ហ៊ុន សែន បានបញ្ជាក់តាមរបស់ទំព័រហ្វេកបុកផ្លូវការរបស់សម្តេចថា «ទោះត្រូវលុបចោលការជួបទាំងខ្មែរទាំងបរទេស តែខ្ញុំនៅតែធ្វើការដូចពេលមុនជាមួយគ្រប់ស្ថាប័នទាំងស៊ីវិលទាំងកងកម្លាំងប្រដាប់អាវុធ រាប់ទាំងការប្រជុំតាម ZOOM ផងដោយសារបច្ចេកទេសនេះមិនតម្រូវអោយមានមនុស្សចូលមកជិតខ្ញុំទេ»៕